維園阿米﹕今日新聞不吐不快

新聞第一則
昂坪360纜車未能如期覆工﹕
報導指出遊客失望，昂坪商舖店主損失生意，議員擔心3日一小修，10日一大停，會進一步影響香港旅遊業。

維園阿米的回應﹕
車，反正聽日阿風神都會路過香港，係唔係個纜車都要再停架啦，如果今日開咗，聽日又停，咁咩又搵嚟搞。計我話索性close咗佢轉型做博物館。咁d旅客咩可以用另一種的心態嚟參觀昂坪囉。

而且博物館仲可以公開營運模式及資料比d大專院校的學生做case studies，研究一下當中的成敗得失。受惠的學科可以係天文科學﹑機電工程﹑社會及公共關係 (PR)﹑酒店及旅遊﹑生態環境﹑城巿規劃及建築﹑當然唔少得工商管理啦。分分鐘呢個case studies可以吸引海外院校搞tour交流，話晒都係「聞名海外」喎，一定吸引到唔少學生，想知道點解個project可以搞成咁……唔通，真係一開始就注定係失敗﹖定係開幕時唔記得拜神﹖咦，可以吸引埋主修風水相學命理的學生喎。睇嚟呢筆交流費的收入都未話唔少。

不過，如果我係海洋公園，咁我一定會即刻推出一個以「想搭纜車﹖好彩有海洋公園。」為口號的廣告。哈。

新聞第二則
迷你蜘蛛俠SS現身天水圍﹕
報導指一對年僅8歲同6歲的小姐弟因肚餓而從34樓的住所沿著屋外水渠爬行往下層。事件驚動社署。小姐弟現留屯門醫院作進一步觀察，當局亦為其母親安排心理輔導，兩姐弟將安排入住兒童院，由社署署長看管……

維園阿米的回應﹕
對於呢個新聞，其實我真係好唔明有關當局的反應，話我無同情心都係咁講﹕我覺得成件事overact囉。

呢件事第一，擺明就係對細路百厭，如果佢地阿媽出咗街，獨留佢地喺屋企，咁就告佢疏忽照顧啫，家下就真係連「瞓下覺」都犯法啦。大佬，肚餓唔識叫阿媽起身﹖唔通佢地阿媽真係掛住瞓又或者到成隻死豬咁唔理佢﹖定係叫阿媽起身會比阿媽打﹖係喎，兩姐弟要留院觀察，唔通佢地比人虐待 or 懷疑比人虐待﹖

第二就係點解呢個家庭有細路都唔安窗花唔上鎖，喂，呢d係基本家居安全智識嚟架喎，會唔會係呢個社區的潛在問題﹖與其放過多注意力喺呢對姐弟身上，不如睇睇呢個社區啦。