假如我是精算師﹕一千六百萬的隱形富豪

(請注意，閱讀時請將音量收細，有咁細得咁細，最好mute咗條聲去。因為，以下內容全屬蔡氏一族之秘密，未經許可，不得外洩。嘻嘻……)

我呢懷疑我阿爸阿媽其實係隱形富豪嚟架。身家估值……(精算中)……嘻……應該有……一千六百萬呀。
(o殊﹗)

都係多得李麗珊篤咗佢地出嚟囉，唔係我矇下矇下呀仲。呢，個電視廣告未成日話乜野唔知邊份報紙話﹕養大一個bb要四百萬o既。哼，我呢就有四兄弟姐妹，即係話我阿爸阿媽至少有一千六百萬喺手先至可以養得大我地幾隻化骨龍呀。

咦，菜甫蛋個細路蔡樂B啱啱出咗世，佢兩兄O既阿爸(即係我細路)個戶口起碼……(再精算)……都有八百萬。嘩，原來佢地個個都係隱形富豪嚟架。

哈哈哈，睇嚟我日後即使繼續賴死唔做野都仲得，斷估佢地點都會有d人情味，點都會射住我o瓜。最多佢地未當我係bb，從頭養過我囉。嘩，咁佢地未會多多四百萬囉又。

咦，呢四百萬應該當係阿爸阿媽o既家產，定係過戶比細路好呢﹖

未住先，佢地唔會以為每養大一個bb，就會有四百萬o既回報呀嘛第日﹖

大鑊﹗咁，我豈不是要比成……(繼續精算)……八百萬出嚟﹖

嗰份咩嘢報紙嚟架﹖有無搵精算師double check架﹖條數究竟係點樣計出架啫﹖我銀包呢家連八十蚊都無，邊度搵成八百萬出嚟呀﹖有無計錯數架究竟﹖